Маданий мерос ҳафталиги

Маданий мерос ҳафталиги

         Тошкентда   “Шарқ ренессанси феномени: давлатлар, динлар ва цивилизациялар”мавзусида маданий мерос ҳафталиги очилди.

     Ушбу ҳафталик Ўзбекистон Республикаси Президенти Шавкат Мирзиёев томонидан маданий меросни ўрганиш ва сақлаш бўйича кўрсатилаётган саъй-ҳаракатлари ва бу борада белгилаб берилган вазифалар ижросини таъминлаш билан боғлиқ. Мазкур ҳафталик шу йилнинг август ойида Самарқанд шаҳрида бӯлиб ӯтган WOSCU VIII Халқаро конгрессининг давоми ҳисобланади.

     Бутунжаҳон жамиятининг конференц-залида ташкил этилган ушбу ҳафталикда маҳаллий ва хорижий экспертлар, олимлар ҳамда кенг жамоатчилик вакиллари иштирок этди.

     Ҳафталикдан кўзланган мақсад эса Янги Ўзбекистоннинг маданий-гуманитар соҳадаги тараққиёт йўли, янги юксалиш даврида эришилаётган ютуқлар ва диний-маърифий соҳадаги ислоҳотларни тарғиб этиш, халқимизнинг бой маданий ва маънавий меросини ўрганиш, асраб-авайлаш ҳамда оммалаштиришда маҳаллий олимлар ва халқаро илмий экспертлар ҳамжамияти билан самарали ҳамкорликни йўлга қўйишдир.

     Ҳафталик доирасида ўтказиладиган тадбирларда мамлакатнинг тарихий ва маданий меросини, айниқса, ёшлар орасида оммалаштириш, Ислом цивилизацияси марказини тақдим этиш ва музей заллари ҳамда кутубхонани янада бойитиш учун ҳамкорлар топиш, шунингдек, Имом Бухорий мажмуасидаги музей лойиҳаларини қўллаб-қувватлашга катта эътибор қаратилади.

     Ҳафталик 27 октябрь куни ўз ишини якунлайди.