Шавкат Мирзиёев 3 апрель куни Тошкентнинг Шайхонтоҳур туманидаги “Гулбозор” маҳалласида бўлди. Бу ҳақда Президент матбуот хизмати хабар берди.
Давлатимиз раҳбари “Тошкентнинг тарихий қисми бўлган” Гулбозор” туризм хизматларига ихтисослаштирилганлини, кўча ва уйларда пойтахтнинг қадимги кўринишини сақлаб қолган ҳолда қўшимча шароитлар яратилганлигини таъкидлади.
Маҳалла кўчасининг бошида тарихий дарвоза қайта тикланди. Ўймакор устунли катта айвон, унга яқин жойда ҳовуз барпо этилди. Миллий каштачилик ва ҳунармандчилик устахоналари, новвойхона, миллий ошхоналар, заргарлик дўконлари ташкил қилинди. “Нон тарихи” ва “Қадимги Тошкентга саёҳат” номли кўргазмалар очилди. Уч юлдузли меҳмонхона ҳам бунёд этилмоқда.
Президент миллий кийимлар ва амалий санъат маҳсулотларини кўздан кечирди, уларни тайёрлаётган ҳунарманд хотин-қизлар билан суҳбатлашди.
“Замонавий мажмуалар ҳамма жойда бор. Биз хорижий сайёҳларни буюк тарихимиз билан кўпроқ жалб этишимиз мумкин. Шунинг учун бу ер кеча-ю кундуз фаолият юритадиган туристик марказга айланиши керак. Бундай этнографик масканларни кўпайтириш, миллий қадриятларимизни намойиш этиш, турли фестиваллар ўтказиш зарур”, — деди Шавкат Мирзиёев.
