Андижоннинг тараққиёт харитаси

Андижоннинг тараққиёт харитаси

Президент Шавкат Мирзиёев 23 сентябрь куни Андижон вилоятига келди.

Андижон халқаро аэропорти замонавий қиёфа касб этиб, унинг имкониятлари кенгаймоқда. Президент Шавкат Мирзиёевнинг вилоятга ташрифи мазкур объектда амалга оширилаётган бунёдкорлик ишлари билан танишишдан бошланди.

Давлатимиз раҳбари бундан уч йил аввал ҳудудга ташрифи чоғида аэропортни модернизация қилиш бўйича қатор топшириқлар берган эди. Ўтган йилги ташриф давомида ҳам реконструкция жараёнини шахсан кўздан кечирган.

Аэропорт 1978 йилда ишга туширилиб, 2013 йилда унга халқаро мақом берилган. Умумий майдони 243,4 гектар бўлган объектда 100 нафар ходим меҳнат қилади. Вақт ўтиши билан ҳаво бандаргоҳини замон талабларига мослаштириш, йўловчилар учун қулайликларни ошириш ва парвозлар географиясини кенгайтириш зарурати юзага келди.

Бугунги кунда Андижон халқаро аэропорти орқали маҳаллий ва халқаро йўналишларда еттита авиакомпаниянинг мунтазам қатновлари йўлга қўйилган. Келгусида йиллик авиарейслар сонини 808 тадан 2 минг 500 тагача ошириш, йўловчиларга хизмат кўрсатиш имкониятини йилига 3,5 миллион нафарга етказиш режалаштирилган.

Шундан сўнг давлатимиз раҳбари вилоятдаги корхоналар билан танишди.