“Моҳир ҳунармандлар” кўргазма-савдоси

“Моҳир ҳунармандлар” кўргазма-савдоси

      Пойтахтимизда “Ҳунарманд” уюшмаси томонидан “Моҳир ҳунармандлар” кўргазма-савдоси бўлиб ўтди. Унда 100 нафарга яқин энг моҳир ҳунармандлар ўзларининг ноёб асарлари билан иштирок этди.

      Бугунги кунда республика миқёсида ҳунармандчиликнинг 32 та йўналиши бўйича жами 27,5 минг нафар ҳунарманд фаолият юритиб келмоқда. 2025 йилнинг биринчи чорагида уста-шогирд анъаналарини ривожлантириш орқали бу йўналишда жами 15 минг 176 та иш ўрни яратилди.

      “Ҳунарманд” уюшмаси томонидан хотин-қизларни ҳунарга жалб этиб, бандлигини таъминлаш мақсадида ўқув курслар ташкил қилиниб, уларда 67 нафар аёлга ҳунар ўргатилди.

      Ҳунармандлар фаолиятини кенг оммага таништириш, уларнинг меҳнат маҳсулини қўллаб-қувватлаш мақсадида ташкил этилган кўргазмада намойиш этилган асарлар табиий маҳсулотлардан қўлда тайёрланган бўлиб, унда ҳунарманднинг қалб қўри, кўз нури ҳамда халқимизнинг орзу-истаклари ва минг йиллик анъаналари мужассам.

      Кўргазмада хорижлик меҳмонлар ҳам иштирок этди.