Бахши, оқин ва жировлар баҳси
Бахши, оқин ва жировлар баҳси
Хоразм вилоятида IV халқаро бахшичилик санъати фестивали доирасида бахши, оқин ва жиров ижрочилари кўрик-танловининг республика босқичи якунига етди.
Буюк аждодларимизнинг кўп асрлик ҳаёт тажрибалари, эзгу орзу- интилишлари, юксак фазилатларини ўзида мужассам этган боқий меросимизни кенг тарғиб қилишга хизмат қилаётган танлов икки кун давом этди.
Танловда мамлакатимизнинг барча ҳудудларидан келган бахши, оқин жировлар, фольклоршунос олимлар, маданият, санъат фидойилари, давлат ва жамоат ташкилотлари вакиллари, халқ оғзаки санъати мухлислари иштирок этди. Танловда 78 нафар бахши, оқин ва жировларнинг ижрочилик йӯналишларидаги маҳоратини санъатшунос олимлар, Ўзбекистон халқ бахшиларидан иборат нуфузли ҳакамлар ҳайъати баҳолаб борди.
Танлов доирасида энг чечан бахши, оқин ва жировлар аниқланди. Якуний натижаларга кўра, энг юқори ўринни қашқадарёлик Зиёдилла бахши Аҳмедов ҳамда хоразмлик Каримбой бахши Отамуродов эгаллади.
